Waislaam wachoshwa na Mfumo Kristo kuongoza nchi

Waitaka serikali kusema kama

imeshindwa, ili wachukue hatua

Salim Said
WAISLAAM Tanzania wametoa tamko lao kuhusu kauli mbalimbali za maaskofu na vurugu za Arusha zilizosababisha vifo vya watu watatu na kujeruhi 29 huku wakionya kuwa, dhuluma ya udini italisambaratisha taifa miaka michache ijayo iwapo Serikali haitachukua juhudi za makusudi kudhibiti hali hiyo iliyojitokeza kwa kasi nchini.

Katika tamko hilo pia Waislaam wamewatuhumu maaskofu nchini kwamba ndio waliochochea vurugu hizo kwa lengo la kuingia madarakani kwa nguvu, baada ya Chama, ilani na Mgombea wao kukataliwa na Watanzania katika Uchaguzi mkuu wa Oktoba 31 mwaka jana.

Tamko hilo linaonyesha mpasuko wa wazi baina ya viongozi wa dini wa kiislaam na wa kikristo kuhusu mgogoro na vurugu za Arusha.

Akisoma Tamko hilo kwa niaba ya Waislaam nchini, Mhadhiri Mashuhuri wa Msikiti wa Idriisa Jijini Dar es Salaam, Sheikh Ali Baswaleh (Mzee wa Kunukuu), aliitaka serikali na chama tawala kuwaeleza Watanzania kama imeshindwa kusimamia haki, ili waislaam wachukue hatua ya kulinda haki zao kwa gharama yoyote ile.

“Madam mfumo kristo umeimarika kiasi kiasi cha kuitisha serikali na viongozi wake na wakatishika hadi kuomba radhi, na kuvitisha na hata kuvikemea vyombo vya dola na kusalimu amri, waislaam tukatae,” alisema Sheikh Baswaleh na kuongeza:

“Kama alivyotahadharisha Waziri wa Mambo ya Nje, Bernard Membe ukweli ni kwamba hatupita muda mrefu dhuluma ya udini utalisambaratisha taifa letu kama ulivyolisambaratisha la Ivory Coast ambalo miaka ya 1960 na 1970 lilkuwa mfano wa kuigwa duniani.”

Huku akiungwa mkono na kutiwa hamasa na takbiri kutoka kwa maelfu ya waislaam walifurika katika ukumbi wa Diamond Jublee, Sheikh Baswaleh alisisitiza, “Kwa kuwa tunadhalilishwa na kubaguliwa kwa sababu ya uislaam wetu nchini mwetu, hatuna budi kushikamana kama waislaam.”

Sheikh Baswaleh alisema dhuluma ya udini haitaondolewa na Katiba Mpya hivyo ni wajibu wa kila muslaam kupigania ukombozi kwa kushiriki kikamilifu katika mchakato wa kuandaa katiba mpya wakiwa raia huru sawa na wenzao.

“Waislaam popote tulipo tunao wajibu wa kuorodhesha dhuluma za udini tunazofanyiwa na kupigania ziondolewe kwanza na baadaye kulipwa fidia,” alisema Baswalehe.

Baswaleh alitaja baadhi ya mifano ya dhuluma hizo za udini kuwa ni Sheria ya Ugaidi, Mkataba baina ya Serikarli na Kanisa (MoU), Mauaji ya Mwembe Chai, Maandamano ya Dibagula, mauaji ya Waslaam Zanzibar, Waziri Mkuu Mizengo Pinda kuwaomba radhi maaskofu Sumbawanga, Samuell Malecela kumtaka aliyewaambia maaskofu wa Arusha wavue majoho ya dini na wavae ya siasa awaombe radhi.

Alisema katiba mpya haiwezi kulinda haki za madhalimu na wadhulumiwa kwa wakati moja na ingawa kipropaganda Tanzania ni nchi moja lakini kuhalisia ni nchi yenye jamii mbili zenye hadhi tofauti.

“Umefika wakati sasa wa kuigawana nchi ili waislaam wanaonyanyaswa na kudhulumiwa waishi katika maeneo yenye waislaam wengi na wakristo wanaotukuzwa waishi katika maeneo ya wakristo wengi, kama Mwalimu Nyerere Julius alivyotetea na kusaidia kujitenga kwa Biafra nchini Nigeria kutokana na udini,” alisema Baswaleh.

Sheikh Baswaleh alisema, “Tukifanya hivyo waislaam watapata uhuru wa kujiamulia mambo yao kama ya mahakama ya kadhi na kujiunga na kongamano la jumuiya za kiislaam duniani (OIC) na sio kuamuliwa na maaskofu.”

Alisema ni wajibu wa kulifikisha hilo kwa waislaam wote nchini ili lijadiliwe kabla halijafikishwa rasmi serikalini kama mapendekezo ya waislaam katika mchakato wa kuunda katiba mpya ya Jamhuri ya Muungano wa Tanzania.

Tamko hilo lenye anuani ya ‘Tamko la Waislaam dhidi ya Maaskofu’ na kurasa 13 liliibua hamasa kwa waislaam huku Takbiir na Innnaa Lillaahi zikitawala kuonyesha kuunga mkono au kusikitika katika baadhi ya aya, lilimnukuu nyerere katika kitabu chake kwamba anayedhulumiwa ni mtu anayeteseka na kwamba asipopambana ataendelea kuteseka na dhalimu kuendelea kunufaika.

“Umefika wakati sasa wa kugawana machungu ya udini tuliyoyabeba peke yetu waislaam kwa miaka 50 ya uhuru Tanzania,” alisema Sheikh Baswaleh huku akiungwa mkono kwa takbiir…Allahu Akbar.

Tamko hilo lilikuwa na sehemu za utangulizi, hali ya siasa nchini, maazimio na dalili ya mvua ni mawingu lilisikilizwa na maelfu ya waislaam waliohudhuria hapo kutoka nchini kote na kusikilizwa moja kwa moja kupitia Redio Iman ya Morogoro na Redio nyingine za kiislaam Dar es Salaam.

Sheikh Mkuu wa Mkoa wa Dar es Salaam kupitia Baraza Kuu la Waislaam Tanzania (Bakwata), Alhad Mussa Salum ambaye alikuwapo katika hafla hiyo, aliunga mkono tamko hilo na kusisitiza kuwa litaleta heshima kwa waislaam.

“Tamko ni zuri na naamini litaleta heshima kwa waislaam cha msingi ni vyema serikali na wakristo wakawajali na kuwaheshimu waislaam kama raia halali wa Tanzania katika haki zao,” alisema Sheikh Salum.

Awali mwakilishi wa waislaam wa Mwanza Sheikh Kapungu Ilunga aliwatuhumu vikali maaskofu kuwa ndio chanzo cha vurugu za Arusha.

“Maaskofu walipoona ilani yao, Chama chao cha Chadema, mgombea wao Padri mwenzao Dk Willibrod Slaa amekataliwa na watanzania wakaamua kuchochea vurugu kwa lengo la kutaka kuingia madarakani kwa nguvu zote,” alisema Ustadh Ilunga huku akishangiriwa.

“Lakini, ‘who are’ maaskofu katika serikali na nchi hii? Ni nani hasa maaskofu mpaka serikali iwapigie magoti, ishindwe kuwakemea, kuwaonya na mwenendo wao,” alihoji Ilunga huku akijibiwa na umma wa Waislaam kuwa, si chochoteee…taka taka tu.

“Tunawaweza sisi maaskofu, tunaweza kuwanyamazisha maaskofu, tunachotaka kama serikali imeshindwa kuwawajibikia watanzania walioiweka madarakani iseme ili waislaam tulinde haki zetu kwa gharama yoyote,” aliongeza Ilunga alipokuwa akiwasilisha mada ya ‘Uislaam na Hatari ya Mfumo Kristo Tanzania’.

Naye Sheikh Ponda Issa Ponda alisema kuna haki za kikatiba za watanzania ambazo serikali na polisi wanapaswa kuzilinda na kuhakikisha kuwa hakuna mtu anayeachiwa kuzikiuka au kuziminya.

Mkutano huo wa aina yake ulihudhuriwa na Taasisi na Jumuiya zote za kiislaam nchini ikiwa ni pamoja na Bakwata, Baraza Kuu na Jumuiya za Kiislaam (T), Islamic Propagation Center (IPC), Chuo Kikuu cha Waislaam Morogoro (MUM), Taasisi ya Wasomi wa Kiislaam (Tampro) na Taasisi ya Answari Sunna na nyingine nyingi kutoka kila kona ya Tanzania.

HAYA WAISLAAM NDANI YA MTI WA X-MASS

Hii ni namna gani vijana wetu wa kiislaam wasivyojielewa wanaona fahari kujiona sura zao zinawekwa katika mti wa X-Mass. "Innaaa lillaahi wainnaaa ilaihi rajiuun"'

Dk Shein ateua Baraza la Mawaziri 25 Z’bar

Salma Said, Zanzibar

RAIS wa Zanzibar na Mwenyekiti wa Baraza la Mapinduzi, Dk Ali Mohammed Shein ameteua Baraza la Mawaziri la serikali ya umoja wa kitaifa lenye mawaziri 25 kutoka vyama viwili vikuu visiwani humo.

Taarifa iliyotolewa na Ikulu ya Zanzibar jana ilieleza kuwa uteuzi wa mawaziri hao 15 kutoka CCM na 10 kutoka CUF unaanza mara moja na kwamba wataapishwa leo jioni katika Viwanja vya Ikulu mjini Zanzibar.

Rais Shein amewateua mawaziri hao kwa mujibu wa uwezo aliopewa chini ya Vifungu 42 (1) na (2), 43 (1) na (2) na 47 vya Katiba ya Zanzibar ya Mwaka 1984.

Dk Shein ameunda Wizara 16 na kuwateua Wajumbe wa Baraza la Mapinduzi, Mawaziri na Naibu.

Walioteuliwa ni Dk Mwinyihaji Makame (Ofisi ya Rais na Mwenyekiti wa Baraza la Mapinduzi), Omar Yussuf Mzee (Waziri wa Nchi, Ofisi ya Rais: Fedha, Uchumi, na Mipango ya Maendeleo) na Haji Omar Kheri Waziri wa Nchi Ofisi ya Rais (Utumishi wa Umma na Utawala Bora).

Wengine na wizara zao katika mabano ni Fatma Abdulhabib Fereji (Waziri wa Nchi Ofisi ya Makamu wa Kwanza wa Rais) na Mohammed Aboud Mohammed(Waziri wa Nchi Ofisi ya Makamu wa Pili wa Rais).

Aboubakar Khamis Bakary (Waziri wa Katiba na Sheria), Hamad Masoud Hamad (Waziri wa Miundombinu na Mawasiliano) na Ramadhan Abdulla Shaaban (Waziri wa Elimu na Mafunzo ya Amali).

Juma Duni Haji anakuwa Waziri wa Afya, Zainab Omar Mohammed (Waziri wa Ustawi wa Jamii na Maendeleo ya Wanawake na Watoto), Abdilahi Jihad Hassan (Waziri wa Habari, Utamaduni, Utalii na Michezo) na aliyekuwa Naibu Waziri Kiongozi, Ali Juma Shamhuna anakuwa Waziri wa Ardhi, Makazi, Maji na Nishati.

Pia wapo Mansoor Yussuf Himid (Kilimo na Maliasili) Nassor Ahmed Mazrui (Biashara, Viwanda na Masoko), Said Ali Mbarouk (Mifugo na Uvuvi) na Haroun Ali Suleiman (Kazi, Uwezeshaji Wananchi Kiuchumi na Ushirika).

Mawaziri wasiokuwa na wizara maalumu wa Baraza la Mapinduzi ni Suleiman Othman Nyanga, Haji Faki Shaali na Machano Othman Said.

Naibu Mawaziri walioteuliwa ni: Issa Haji Ussi (Miundombinu na Mawasiliano), Zahra Ali Hamad (Elimu na Mafunzo ya Amali), Dk Sira Ubwa (Afya) na Bihindi Hamad Khamis (Habari, Utamaduni, Utalii na Michezo).

Wengine ni Haji Mwadini Makame (Ardhi, Makazi, Maji na Nishati) na Thuwaiba Edington Kissasi (Biashara, Viwanda na Masoko).

MAMBO YA TMK WAKATI WA UZINDUZI WA ALBAMU YA TAARABU

Dooh...Jamaa wanataka kumbandua hadharani. kaanguka kwa Pombe

BREAKING NEWSS..... NEC yatupilia mbali ombi la Chadema

MWENYEKITI wa Tume ya Taifa ya Uchaguzi (NEC), Jaji Lewis Makame ametupilia mbali ombi lililotolewa na mgombea urais kwa tiketi ya Chama cha Demokrasia na Maendeleo (Chadema), Dk Willibrod Slaa la kutaka kusitishwa kwa utangazwaji wa matokeo ya urais na kutaka kazi hiyo ianze upya kwa madai kuwa maafisa wa usalama wa taifa wamechakachua matokeo hayo.

Katibu Mkuu wa Wizara ya Maendeleo ya Jamii Jinsia na Watoto Maryam Mwafisi akizindua semina katika Taasisi ya Elimu ya Watu Wazima (TEWW), Kuchoto ni Mkurugenzi wa TEWW Lambertha Mahai na kulia ni Mkurugenzi wa Elimu ya Watu Wazima Salum Mnjagila. Picha na Salim Said

Mkurugenzi wa TEWW Lambertha Mahai na kulia ni Maryam Mwafisi. Picha na Salim Said

Katibu Mkuu wa Wizara ya Maendeleo ya Jamii Jinsia na Watoto Maryam Mwafisi akizindua semina katika Taasisi ya Elimu ya Watu Wazima (TEWW), Kuchoto ni Mkurugenzi wa TEWW Lambertha Mahai na kulia ni Mkurugenzi wa Elimu ya Watu Wazima Salum Mnjagila. Picha na Salim Said

HESLB, yachakachua majina ya waombaji wapya wa mikopo

* BAADHI WADAI HAWAONI MAJINA YAO, VYUO VYAO

Salim Said

HOFU na wasiwasi umetanda miongoni mwa wanafunzi wa vyuo mbalimbali nchini, baada ya Bodi ya Mikopo ya Elimu ya Juu Tanzania (HESLB), kutangaza orodha ya majina ya vyuo na waombaji waliofanikiwa kupata mikopo, huku majina ya baadhi ya vyuo na waombaji kutoonekana katika orodha hiyo.

Hofu hiyo imekuja kufuatia HESLB kutangaza majina ya baadhi ya vyuo na baadhi ya waombaji waliofanikiwa kupata mkopo huo, huku vyuo vingine na majina ya baadhi ya waombaji kutoonekana.

Taarifa iliyochapishwa katika mtandao wa bodi hiyo, inasema waombaji na vyuo ambavyo majina yao hayapo katika orodha hiyo ya kwanza wanashauriwa kuwa wavumilivu, kwa kuwa kuna orodha nyingine ya majina ya vyuo na waombaji yanayotarajiwa kuchapishwa siku chache zijazo baada ya kumalizika kwa mchakato wa kupanga mikopo hiyo.

Taarifa kutoka ndani ya HESLB waombaji hao wamegawanywa katika makundi mbalimbali na kwamba kundi lililochapishwa katika mtandao wake ni la waombaji 25,000 pekee kati ya zaidi ya 30,000 wanaotarajiwa kupata mkopo huo.

Kutokana na taarifa hiyo, zaidi ya waombaji 5,000 wa mikopo hiyo hawajatangazwa majina yao katika orodha hiyo ya kwanza, iliyopo katika mtandao wa HESLB, huku wakiwa na hofu kuwa ndio wamekosa mkopo.

Baadhi ya wanafunzi wamekuwa wakipiga simu mara kwa mara katika chumba cha habari cha gazeti hili, wakilalamikia kutoona majina yao katika orodha hiyo iliyochapishwa katika mtandao wa HESLB.

Wakizungumza na Mwananchi kwa njia ya simu kwa nyakati tofauti jijini Dar es Salaam jana, baadhi ya waombaji ambayo majina yao na au ya vyuo vyao hayapo katika orodha hiyo, walisema hadi sasa wako njia panda.

“Kwa kweli sijajua kama nitasoma au sitasoma kwa sababu nilitegemea mkopo wa bodi ya mikopo ya serikali lakini nashangaa jina langu halipo katika orodha iliyowekwa katika mtandao wa bodi hiyo,”alisema Juma Omar ambaye ni mmoja kati ya walioomba mkopo.

Lakini Mkurugenzi wa Habari, Elimu na Mawasiliano wa HESLB, Cosmas Mwaisobwa aliwatoa wasiwasi wanafunzi hao kwa kuwaeleza kuwa, majina ya vyuo na waombaji waliyochapishwa katika mtandao wa bodi hiyo ni baadhi tu na kwamba mchakato wa kuchanganua majina hayo bado unaendelea.

“Majina yaliyochapishwa ni baadhi tu ya vyuo na wale walioomba mkopo, mchakato unaendelea na mengine yatachapishwa hivi karibuni,”alisema Mwaisobwa.

Alifafanua kuwa, katika awamu hiyo ya kwanza zaidi ya majina ya waombaji 25,000 yamechapishwa na kwamba mengine yapo katika hatua za mwisho kuchapishwa.

Hata hivyo, Mwaisobwa alisema hakuweza kutaja idadi kamili ya jumla ya watu walioomba mkopo na waliofanikiwa mkopo kw mwaka huu wa masomo wa 2010/11.

“Unajua sina idadi kamili kwa sasa kwa sababu nipo nyumbani lakini nipigie kesho nikiwa ofisini itakupatia idadi kamili,”alisema.

Mkurugenzi huyo wa Habari alilaumu tabia ya baadhi ya waombaji wa mikopo ambao hawajaona majina yao katika orodha ya ‘Means Test’ ya bodi hiyo kutumia njia ya kupiga simu katika vyombo vya habari na kulalamika wakati sio chombo kinachoweza kutatua tatizo lao.

“Mimi nipo ofisini wazi kabisa kila siku, waje pale kama wana tatizo lolote. Sio kuanza kupiga simu katika vyombo vya habari, vitakusaidiaje kwani wao ndio wanatoa mkopo au wanafanya ‘Means Test,” alihoji Mwaisobwa.

Kwa mujibu wa majina yaliyochapishwa katika mtandao wa HESLB, kiwango cha mkopo kinatofautiana kwa wale waliofaulu kinatofautiana kutoka mwombaji mmoja hadi mwengine.

Tarrifa hiyo inaonyesha kuwa, wapo watakaopata mkopo wa asilimia 100 kwa daraja ‘A’ hadi wale wataopata mkopo wa asilimia 10 daraja ‘J’hadi asilimia 0 daraja ‘K’.

Kwa mujibu wa kalenda za vyuo vingi nchini, wanafunzi wanatakiwa kurudi vyuoni kuendelea au kuanza masomo kuazia Novemba 1 mwaka huu, ambapo kufika kwao vyuoni kunategemea sana kufanikiwa au kutangazwa kwa majina yao kwamba yamefanikiwa kupata mkopo.

Utaratibu wa kusoma elimu ya juu kwa njia ya fedha za mkopo kutoka serikalini, ulianza miaka mitano iliyopita baada ya serikali kufuta sera yake ya kutoa elimu ya juu bure sambamba na kuanzisha chombo cha kusimamia utaratibu wa kutoa na kurudisha mikopo kwa wanafunzi wa elimu ya juu.

Lakini mfumo huo umekuwa ukikabiliwa na changamoto kadhaa ikiwa ni pamoja na malalamiko, migomo na aminoamano yasiyokwisha kutoka kwa wanafunzi wa taasisi mbalimbali za elimu ya juu, kuhusu mfumo mzima wa utoaji wa mikopo hiyo.

Orodha ya vyuo vilivyofanikiwa ni pamoja na Chuo Kikuu cha Bugando, Chuo cha Elimu ya Biashara Dar es Salaam na Dodoma (CBE), Community Development Training Institute, College of Engineering and Technology, Chuo cha Elimu Zanzibar, Taasisi ya Teknolojia Dar es Salaam (DIT), Chuo Kikuu Kishiriki cha Elimu Dar es Salaam (DUCE), Institute of Accountancy Arusha, Taaisi ya Elimu ya Watu Wazima (TEWW), Taasisi ya Usimamizi wa Fedha (IMF) na Institute of Medicine and Technology University.

Vyengine ni Institute of Rural Development Planning, Taasisi ya Ustawi wa Jamii, chuo kikuu cha Makumira, Taasisi ya Sayansi na Teknolojia Mbeya, chuo kikuu kishiriki cha Elimu Mkwawa, Moshi University College of Cooperatives and Business Studies, Chuo kikuu cha Mount Meru, chuo kikuu cha Tiba Muhimbili, chuo kikuu cha Waislaam Morogoro, chuo cha Kumbukumbu ya Mwalimu Nyerere, Mwenge University College of Education na chuo kikuu cha Mzumbe.

Kwa mujibu wa taarifa hiyo vyuo vingine ni National Institute of Transport, Ruaha University College, School of Journalism and Mass Communication, Sebastian Kolowa University College, St. Augustine University Tanzania matawi ya Mtwara na Mwanza, St. John’s University of Tanzania kampasi ya Dar es Salaam na Dodoma.

Vingine ni St. Joseph College of Engineering, Chuo Kikuu cha Serikali ya Zanzibar (Suza), Stephano Mosha Memorial University, chuo kikuu cha kilimo cha Sokoine (SUA), Tanzania Institute of Accountancy, Teofilo Kisanji University, chuo kikuu cha Tumaini Dar es Salaam, Iringa na KCMC, chuo kikuu cha Arusha, chuo kikuu cha Dar es Salaam na chuo kikuu cha Dodoma.